XORIJLIKLARGA O‘ZBEK TILI TIBBIY LEKSIKASINI O‘RGATISHGA OID LINGVOMADANIY YONDASHUVLAR

Abstract

Ushbu maqola xorijliklarga o‘zbek tili tibbiy leksikasini o‘rgatishda zamonaviy yondashuvlar va metodlarni tahlil qiladi. Maqolada o‘zbek tili tibbiy leksikasining ahamiyati va uning xorijiy o‘rganuvchilar tomonidan o‘zlashtirilishi uchun kerakli metodologik yondashuvlar ko‘rib chiqilgan. Tibbiy leksika nafaqat umumiy so‘zlar va atamalarni, balki turli hududiy shevalarni ham o‘z ichiga oladi. Xususan, Toshkent, Samarqand, Farg‘ona hududlaridagi farqlarni o‘rganish o‘quv jarayonini samarali qilishda muhimdir. Maqolada lingvomadaniy yondashuvlarning tibbiy terminologiyani o‘rgatishda ahamiyati ta'kidlanadi. Hududiy shevalardagi tibbiy atamalar, masalan, adabiy tildagi “shifokor” so‘zi Farg‘ona va Toshkentda “do‘xtir” yoki "tabib" shaklida ishlatilishi, tilni o‘zlashtirishda va tibbiy amaliyotni to‘g‘ri tushunishda o‘ziga xos qiyinchiliklarni keltirib chiqaradi. Shuningdek, maqolada interaktiv va amaliy yondashuvlar, masalan, onlayn platformalar, mobil ilovalar va virtual simulyatsiyalar orqali o‘quv jarayonining samaradorligini oshirishga alohida e'tibor qaratilgan. Ushbu metodlar xorijiy talabalar uchun tibbiy terminlarni o‘rganishni osonlashtiradi. Tadqiqotning asosiy maqsadi xorijiy talabalarga o‘zbek tibbiy leksikasini o‘rgatish jarayonida hududiy shevalar va lingvomadaniy yondashuvlarni hisobga olishni o‘rganishdir. Ushbu ilmiy yondashuvlar tibbiy ta'lim sifatini yaxshilash va xalqaro miqyosda tibbiy xizmatni samarali tashkil etish imkonini yaratadi.